چرخہ پنجابی روایت اور لوک ادب میں خصوصی اہمیت کا حامل ہے- لوک گیتوں سے لے کر صوفیانہ کلام تک اسکا شاید ہی کوئی پہلو ہو گا جسکا تذکرہ پنجابی شعر میں نہ آیا ہو- چرخے کے رنگ وروغن،اسکی ساخت،ہتھی، تکلے اور ماھل سے لے کر اسکی گھوں گھوں کی خوابناک آواز،بلکہ روئی کی پونی،سوت(تند) اور ترنجن تک چرخے کا ہر پرزہ ہر جوڑ،اور اس سے متعلق ہر شے اور عمل،انسانی زندگی،جذبات واحسات،وصل وفراق،کیف ونشاط،امیدوبیم،یاس ورنج اور موت وحیات کے فلسفے کی تشریح میں بطور علامت استعمال ہوا ہے- بلھےشاہ کہتے ہیں ۔

کر کتن ول دھیان کڑے

نت متیں دیندی ما دھیا                        کیوں پھرنی ایں ایویں، آ دھیا

نی شرم حیا نہ گوا دھیا                       توں کدی تاں سمجھ ندان کڑے

کر کتن ول دھیان کڑے

ماں،بیٹی کو تنبیہ کر رہی ہے،کہ "کاتنے" کی طرف مائل ہو- میں تمہیں ہر روز نصحیت کرتی اور عقل کی بات سکھاتی ہوں،کہ یوں بیکار نہ پھرو،عمل کی طرف راغب ہو- اپنی شرم وحیا کو(ناشکری سے) مت ضائع کرو، اے نادان کبھی تو سمجھ سے کام لو، اور "کاتنے" کی طرف دھیان دو ۔