مرغان چمن کا سرسری تعارف اور کـچھ نۓ پرندے

یہ سفر ااس لائق تو نہيں کہ اسے لکھا جاۓ

دراصل کے ٹو کہانی نانگاپربت یاک سراۓ اور سنولیک کے بعد کوئی بھی سفر پہاڑوں کا سفر اس لائق نہيں لگتا کہ اسے لکھا جاۓ۔۔۔۔

لیکن اس سفر کے کچھ کردار ایسے ہیں جنہیں لکھا جانا چآہیے۔۔۔

یہ کردار ایسے ہيں کہ اگر انہیں میں نے نہ لکھا تو یہ بدروحیں بن کے میرے خوابوں میں آئیں گے۔ رات کو غسل خانے کی بتی جلانے سے پہلے وہاں موجود ہوں گے اور ہم آگۓ ہم آگے کے قہقہے لگاتے میری روخ فنا کر دیں گے۔۔۔ پریشان کریں گے مجھے ڈرائیں گۓ۔

تومیں ان کرداروں سے چٹکارا حاصل کرنا چاہتا ہوں۔

صرف اس لیے میں اس سفر کو بھی لکھنا چاہتا ہوں اگرچہ یہ اس لائق نہيں کہ اسے لکھا جاۓ چونکہ اس کے سفری داستان میں چمن اتنا اہم نہیں جتنے کہ اس میں چہکنے والے پنچھی پرند اور پکھیرو اس لیے مناسب رہے گا اگر ان طیور ان مرغان چمن کا سرسری تعارف کروادیا جاۓ جیسا کہ ڈرامہ نگار سکرپٹ کے آغاز میں مرکزی کرداروں کی خصلتیں اور عادتیں مختصر بیان کردیتاہے  تاکہ پروڈیوسر کوکاسٹنگ میں آسانی ہو کہ کونسا ادا کارکس رول کے لیے موزوں رہے گآ۔

ان میں کچھ قدیمی پنچھی ہيں جو متعدد کوہ نوردلوں میں میرا ساتھ دے چکے ہيں اور میرے پڑھنے والے ان سے بخوبی واقفیت رکھتے ہيں او رکچھ پرندے نۓ نویلے ہيں جو پہلی بار چمن میں چہکے ہيں۔

پرانے اور کھانگڑ پنچھیوں میں میآں فرزند علی ہيں جو پرندے کو پڑندہ اور گھڑے کو گھرا کہتے ہيں۔ اندورن بھاٹی گیٹ کے قدیمی مکین ہيں اس لیے انہیں باہر کی ہوا نہيں لگی۔ چنانچہ ان کی لاہوری وضع داری اور یاڑوں پر قڑبان ہونے کی خصلت نہيں بدلی اسی لیے دنیاداری کے ناپ تول کے ماہر نہیں۔ ناچے پتھروں اور ناچنے والیوں کو پرکھنا جانتے ہيں  انہی  کے بارے میں اولڈ از گولڈ کا محاورہ گھرا گیاتھا معاف کیجیے گا گھڑا گیاتھا۔